Татарстан социаль инфраструктура объектларын төзүгә 1,8 млрд сум алачак

Быел Татарстанга федераль бюджеттан социаль ифраструктура объектларын сафка бастыруга 1 млрд 791 млн сум акча бүлеп биреләчәк. Бу хакта кичә Татарстан Хөкүмәтенең республика профсоюз активы белән очрашуда Татарстан төзелеш, архитектура һәм торак-коммуналь хуҗалык министры Ирек Фәйзуллин хәбәр итте.

Чыгыш ясаучы сүзләренчә, агымдагы елда 215 социаль-мәдәни объект төзү һәм 50 объектны капиталь төзекләндерү планлаштырылган. Бу максатларга 154,2 млн сум тотарга ниятлиләр.

«2017 елда республикада төзелеш һәм капремант өлкәсендә 36 программа тормышка ашыру ниятләнә. Күпчелек программаларны без сентябрьгә кадәр төгәлләргә җыенабыз, — дип хәбәр итте ул.

«Быел иҗтимагый киңлекләрне үстерү программасы кысаларында муниципаль берәмлекләрдә парклар, скверлар, су саклау зоналары төзү һәм төзекләндерү дәвам итәчәк. Бүген без Россия Хөкүмәте карарын алдык. Анда безгә бу максатларга федераль бюджет 1 млрд 89 млн сум акча бүлеп биргән, дип хәбәр ителә. Бу программага Татарстан ишегаллары да өстәләчәк», — дип билгеләде Фәйзуллин.

(Татар-информ)